ភ្នុំពេញ: អង្គភាពសារព័ត៌មាន Bayongtimes ដែលមានគេហទំព័រ www.bayongtimes.com អង្គភាពសារព័ត៌មាន KCTV ដែលមានគេហទំព័រ www.khmerovertv.com និងអង្គភាពសារព័ត៌មាន កម្ពុជារាល់ថ្ងៃ ដែលមានគេហទំព័រ www.cambodiatoday.news ត្រូវបានក្រសួងព័ត៌មានប្រកាសបញ្ឈប់ការផ្ដល់អាជ្ញាប័ណ្ណបន្ត។

ក្នុងលិខិតចុះថ្ងៃទី១៥ ខែមីនា ក្រសួងព័ត៌មានបានបញ្ជាក់ថា ការឈប់បន្តអាជ្ញាប័ណ្ណនេះដោយសារគណៈកម្មាធិការនីតិកម្មនៃក្រសួងព័ត៌មាន បានពិនិត្យ និងស្រាវជ្រាវឃើញថាអង្គភាពទាំង៣ បានធ្វើការផ្សព្វផ្សាយព័ត៌មានដែលបំពានលើក្រមសីលធម៌ វិជ្ជាជីវៈសារព័ត៌មាន និងកិច្ចសន្យាអាជីវកម្មដែលសាមីខ្លួនបានតម្កល់ទុកនៅក្រសួងព័ត៌មាន។

ក្រសួងព័ត៌មាន ក៏ជម្រាបដល់ប្រធានមន្ទីរព័ត៌មានទាំង២៥ រាជធានី-ខេត្ត មិនត្រូវអនុញ្ញាតឱ្យបន្តអាជ្ញាប័ណ្ណ ដល់អង្គភាពសារព័ត៌មានទាំងបីខាងលើនេះឡើយ៕